اول مرة ازرع في البيت المحمي drivhus في بداية الربيع.
في الجزء الاخير من شهر مارس قررت اجرب ازرع في البيت المحمي برغم برودة الاجواء خاصه بالليل والفجر.
اخترت السبانخ ، الخس والفجل لانهم بستحملوا لحد ما البرد. طبعا ممكن عادي يتزرعوا برا ما الا في بيت محمي بس ممكن تاخد زمن اطول لحدي ماتنبت وفي الحاله دي بنصح باستخدام fiberduk لانو في الحاله دي الغطاء دا بيشتغل كبطانيه 😀 وفي الصيف كمان بشتغل حكمه الله بس هسي دا ماموضوعنا.
كمان مابضرورة نزرع في احواض ممكن عادي نزرع في الاصيص المتوفر عندنا ، الايام الجايه حزرع خس وجرجير مع بعض في اصيص عادي بس شويه كبير وحزرع رجله في اصيص براها ، فشنو اي زول يستخدم المتاح عندو🙏🏿
استخدمت تربه قديمه مخلوطه بتربه كمبوست عبارة عن(تربه قديمه اتخلطت مع كمبوست البوكاشي)، لو حابين تعرفوا اكتر عن كمبوست البوكاشي شوفوا الفيديو العملتوا بخصوصوا:
https://youtu.be/fDKkh4mafxA
نرجع للاحواض وطريقة تجهيزها ، اول حاجه فرشت كميه من الورق في قاع الحوض شان امنع احتماليه نمو حشائش.
شان ما استخدم تربه كتير ، ملاءت اكتر من ٣ ارباع الحوض ببواقي صفق الاشجار و بواقي النجيله الجمعتهم في زمن الخريف وتميت باقي الحوض بتربه الكمبوست وفوق ليها تربه قديمه .
الحركه دي بتخلينا نوفر تراب وكمان بتمد الزراعه بعناصر غذائيه اكتر باعتبار انو الاجمالي بتاع الحوض دا عبارة عن كمبوست.
لكن لو لاحظتوا اخر طبقة اضفتها وهي بقت اول طبقت في الحوض ( اتمني ماتكونوا اتلخطبوا هسي )عبارة عن تربه قديمه ، بمعني انو استخدمتها السنه الفاتت وبالتالي تربه فقيرة للعناصر الغذائيه. السبب الخلاني استخدم تربة قديمه انو البذور شان تنبت ، افضل واحسن تنبت في تربه مافيها سماد تقيل ،بما انو جذورها ماحتستحمل امتصاص السماد ، لكن اول ماتقوي وتكبر حتلقي الطبقه البعدها والبعدها وهكذا.
بعد تجهيز الاحواض ، سقيتها كويس حتي بعد كدا قمت بزراعه البذور زي ما شايفين في الصور. بعد خلصت من زراعة البذور سقيتها تاني بشويه موية.
من حسن الحظ انو الاسبوعين الاخيرات من شهر مارس كانوا دافيات ، بس انا كنت بستخدم fiberduk حتي الان بستخدموا خاصه بالليل والفجر لانو دارجات الحرارة بتزل لتحت الصفر.
الفكرة من الزراعة في الوقت دا ، انو الحاجات الانا زرعتها حتكون جاهزه نهايه شهر مايو بالكتير ، وبكدا حكون جهزت البيت المحمي لدورة زراعيه جديدة مع خضروات اخري.
طبعا الخس والسبانخ ممكن نحصد منهم اول باول عن طريق تقليم الاوراق فقط babyleaves او ننتظر نحصدهم مرا واحده ، بس الطريقه الاولي احسن .لكن الفجل حنتطرا ننتظروا .
بنفس الطريقة دي وفي نفس الوقت دا حازرع الايام دي الجرجير والرجلة كمان 🤩 علي اساس ناكلهم قبل الصيف. 🥰
تعليقات
إرسال تعليق