الموسم الزراعي للحديقة المنزلية 2022
سنة جديدة وموسم زراعي جديد معاكم انا أمنه محبة ، هاوية ومهتمة جدا بموضوع النباتات الداخليه والزراعة العضوية بالتحديد الزراعة المنزلية.
بعد دا حنبدا نزرع 😀 ، اااااي دا شهر فبراير ياداب لكن برضو حنبدا نزرع 😊.
هل بتفكروا وتتسالوا عن انو بتحتاجو شنو لو عايزين تزرعوا ليكم شويه خضروات و زهور في البيت السنه دي؟
بتتسالوا كيف ممكن تعملوا الموضوع دا بطريقة ظابطه لروحكم دي ، لجيبكم 😀😇 وللبئية 😁 وتسعدوا من خلال ممارسه
الحاجة ؟
بالتأكيد الزراعة المنزلية لو داخل المنزل او خارج المنزل بتختلف من مكان للاخر حسب الظروف الطبيعية في الأساس بالإضافة الي اشياء اخري مثل الفرص المتاحه من شخص للاخر ، لانو الشخص العندو مساحه حول المنزل تختلف ظروف زراعته لحد ما من شخص لديه بلكونة او شقة. وهذا يعني ان كل شخص ممكن يوظف مايلي من معلومات و شرح ..الخ حسب ظرفه.
كمان الحديقة المنزلية ما بالضرورة تكون بس بيت محمي او حوش، ممكن تكون عبارة عن شباك في شقة او ركن في بلكونة ...الخ .
هنا عندنا في النرويج ، موضوع الحديقة المنزليه(kjøkkenhage) يبدا من يانير لحدي اخر شهر في السنه وهو ديسمبر.
لكن كل فترة زمنية علي مدار السنة بيكون فيها أنشطه معينه حسب المرحلة. فمثلا نهايه الشتاء من يانير وفبراير كتيررر مننا ببدا بالتجهيز للموسم او بالاصح البدء في مرحله جديدة ، مع انو يتخيل لي انو الموضوع دا دائره مغلقه بس مادائره شريره 😇 لانو حتي شهر ديسمبر الزول بيكون مشغلا لي نفسو بشويه حاجات في الغالب بتكون حاجات بسيطه لو قارناها مع الحاجات البتتعمل في الفتره من مايو لي سبتمبر مثلا.
المرا دي حتكلم عن خطتي للموسم الزراعي ل ٢٠٢٢. الأساسي في الخطة الزراعية هو الكالندر الزراعي (التقويم الزراعي)، بالإضافة لي تايم لاين (جدولة زمنية)لكل الأنشطة الأساسية لسنة ٢٠٢٢.
عندنا هنا مامحتاجين ننتظر للربيع شان نبدأ الموسم وذلك لقصر الموسم الزراعي بسبب المناخ. وهناك عدد كبير من الخضروات والزهور تحتاج انو ننبتها داخل المنزل او البيت المحمي(drivhus) في فترة الشتاء والربيع قبل حلول الصيف لكي تنتج لو كانت خضروات او تزهر لو كانت زهور.
بما انو فصل الصيف يمتد من يونيو حتي أغسطس ، دي فتره غير كافيه لمعظم الخضروات والزهور الصيفيه لكي تنبت و تزهر وتثمر مثل (الطماطم والبابريكا). بس دا لا يعني انو ننبت بذور كل الخضروات والزهور داخل المنزل في الفتره من يانير لي مارس ، لا لا لا .
ولذلك بنحتاج للكالندر الزراعي (التقويم الزراعي)، لانو في أنواع من الخضروات والزهور لو نبتناها قبل وقتها ماحتصمد. مثلا الفاصولياء والكوسه مابتاخد وقت طويل من الانبات للازهار والاثمار حوالي ٤٠ يوم تقريبا ، لذلك ممكن عادي ننتظر حتي اخر الربيع ونبدأ بانباتها في اواخر أبريل او مايو.
بالنسبه للمكان فالزراعة المنزلية ممكن في اي مكان لو كان مساحه حول المنزل في شكل احواض مثلا (pallekarm) او في بيت محمي (drivhus) او في برندات، بلكونات، داخل البيت في الشبابيك ، المطبخ مثلا او أماكن تانيه في البيت.
الكالندر الزراعي (التقويم الزراعي)
الهدف الأساسي من الكالندر الزراعي انو نعرف متين ننبت البذور الاخترناها ومتين نحصدها وحتي كيف ننبتها في بعض الكالندرات من خلال رصد معلومات زي عمق البذرة ودرجه الحرارة والرطوبة وكدا.
السنه الفاتت وبالرغم انو الموسم كان نااااااجح لكن كان في استرس والموضوع ما كان ممتع الوقت كلوووو ، لانو كنت ماخداهو بسياسه امسك لي واقطع ليك فلقيت روحي بعمل في كمية في الحاجات في وقت واحد بغض النظر انو دا وقتها او لا ، بالتحديد مساله انبات البذور.
بسبب انو كنت شغاله من غير كالندر زراعي لقيت روحي استخدمت وقت اكتر من المفروض ، جهد اكتر من المفروض ، موارد (تربه ، بذور،،) اكتر من المفروض + استرس لي ولي النباتات الصغيره دي.
وقلنا الكلام دا ليه 🙂 شان نعرف قيمه الكالندر الزراعي.
الموسم دا عملت كالندر من خلال المعلومات البتكون موجودة في كيس البذور ، كمان من مواقع مختلفه ، مثلا ناس (solhatt) 🙃 عندهم في مكان ما في صفحتم مامذكرا وين تقويم بتاع زراعه.
زي ماقلت ليكم اي زول ممكن يضيف معلومات حسب حوجتو للكالندر ، يعني انا مثلا في الكالندر مامحتاجه أضيف معلومه بتوريني ازرع كل بذرة في ياتو عمق، أو بتايتو كميه ضوء لانو اتعودت ، وهكذا 😇.
بالاضافه لكدا ، الكالندر الزراعي دا بتختلف حسب الانترست من شخص لي اخر ، في ناس ممكن تبدأ انبات البذور داخل البيت من شهر ديسمبر و يانير وفي ناس كمان بتبدأ في شهر أبريل او مايو وتزرع مباشرة في احواض او اصايص مثلا.
في الرابط دا علي صفحتي بانستغرام
https://www.instagram.com/p/CZ7aZ_pgnCD/?utm_medium=copy_link
حتلقوا الكالندر بتاع الحاجات الحزرعا في الموسم دا . الأساسي في الكالندر بتاعي هو الزمن الحزرع فيو و الوقت الزرعت فيو ، بس ممكن عادي اي زول يضيف حاجات تانيه زي عمق البذرة ، زمن الازهار والحصاد ، مكان الانبات او اي معلومه تانيه بتحتاجو كل مره تمرو عليها.
اما بالنسبه للتايم لاين للموسم الزراعي (الجدولة الزمنيه)، فهو عبارة عن كل النشاطات الحعملا في الموسم مع ربطها بجدوله زمنيه لانو الحاجه دي بتخلي الزول عندو (oversikt ) وقادر يخطط وينفذ ويدير زمنو بطريقة مرنه ومن غير استرس.
الأنشطة اكيد حتكون بتختلف حسب الانترست، نوع الحديقة وكمان المناخ. يعني العندو مساحه وبيت محمي ممكن يكون عندو انشطة اكتر من العندو برندا او ركن في البيت او شابابيك في شقة.
عموما الانشطه الرئيسه دايما بتتمحور حول مرحلة انبات البذور (såing ), إعادة زراعة البراعم ، بحيث يكون لها مكان أفضل (åprikle ) , ولمن الصيف يبدا يدخل نزرع البراعم الأكيد حتكون كبرت في المكان المحدد بغض النظر انو حيكون احواض او اصايص او غيرو. وقبلها وبعدها بيكون في أنشطه مختلفه متعلقه بالمرحلة دي زي مثلا تجهيز الكمبوست ، السماد واكيد متابعة النمو لحدي مانصل مراحل الازهار ، الحصاد ، جمع البذور لحدي مانصل لي نهاية الموسم.
المواضيع الجايه اكيد حتناول فيها معظم المراحل دي من خلال عرض جوانبها المهمة 😀 .
تعليقات
إرسال تعليق