النباتات الصغيرة Mini planter
الحلو في موضوع النباتات الداخلية مابس انو يكون عندكم نباتات كبيره. الحلو كمان انو نجيب شجر صغيرررر (mini planter )ونبدأ نراعيهوا ونشوفوا بيكبر قدامنا وكمان نتعلم ونقوي تجاربنا في الموضوع ، لانو موضوع النباتات الداخلية بحر.
من بدري بحب اشتري الشجرات الصغار(mini planter) واكبرها. لانو مراعاة النباتات الداخلية بحتاج شوية معرفة ومهارات فقلت احسن اتعلم كمان من تجاربي في الشجر الصغير ، طبعا لو التجربة فشلت المغسة مابتكون كبيرة لانو النباتات الصغيره مامكلفه شديد ، لكن كمان فشل التجربة بوجع القلب لانو شخصيا بتتخلق شوية ألفة كدا بيني وبين الشجرات.
المرا دي عايزا أخوض معاكم التجربة دي 😀. اخترت ٣ شجرات صغيرة هي :
1- Pelia (Elefantøre)
2- Kroton (Codiaeum variegatum)
3- Peperomia ferreyrae(Green beans
peperomia)
بس حبدا ب Pelia زي ماشايفين في الصورة التحت ، دا حجم ال mini plant بيكون كدا ، صغيررر شديد. طبعا برغم من صغر حجمها لكن لقيت جذورها طالعين من تحت 😇 ودا معناتا بالجد محتاجه اصيص اكبر . لكن اول شي عملتوا اول ماجيت من المشتل انو دخلتها الحمام واديتها دوووش ، لانو بالجد في الاونه الاخيرة معظم الشجر بقيت بلقي فيها يا اما trips eller ulllus ودي من أشهر انواع الآفات هنا في النرويج ( حشرات صغاااار ). المهم بعد اخدت الدوش هي والمعاها خليتم باتو في الحمام كم يوم شان اتأكد اني اتخلصت من اي حاجه.
هنا حبدا بقدر العرفتوا والعايزا اجربوا، وهو انو حاغيير ليها الاصيص باصيص اكبر ، وتربة مناسبة ، موقع مناسب ، وطريقة بتاعت سقي مناسبة 😀.
نبدأ بتغيير الاصيص والتربة ، اخترتا ليها اصيص فخاري لانو بمتص الموية، وكدا بنضمن تصريف اي مويه زايده. وطبعا الاصيص فيهو فتحه تصريف.
قررت اغير الاصيص لانو النبته قاعده تنمو وجذورها بقت طالعة من تحت، ودا في حد زاتو موشر كافي علي ضرورة تغيير الاصيص.
بالنسبة للتربة عملت خلطة كانت عبارة عن ٧٥% وسائط بتساعد علي تصريف المويه او امتصاصها وبكدا بضمن عدم تعرض الجذور لأي تعفن. الوسائط دي كانت برلايت ، لحاء اشجار، بالإضافة لي شوية ليكا وضعتها في قاع الاصيص.
الباقي ٢٥% من قوام التربة كان عبارة عن تربه نباتات عادية plante jord.
حسب البحث العلمتوا، اتضح انو النبته دي بتحب تربتها تكون مهوية ومابتحتفظ بالموية ، لانو لو دا حصل جذورها حتتعفن.
طريقة السقاية ، كالعادة بسقي بكميه مناسبة من الموية وبوقف شوية ، لو الموية بدت تطلع من فتحات التصريف المن تحت معناتا نوقف ولو حصل العكس نواصل نسقي تاني لمن الموية تبدأ تطلع من فتحات التصريف. ونسقي لمن نتأكد ان النبته عطشانه.
من ضمن الإشارات البتورينا انو ال pelia عطشانه انو الاغصان بتاعتا بتبدأ تنحي للاسفل وشكلها يكون زي التعبان.
انا خترت ليها موقع بيكون فيو ضوء غير مباشر معظم اليوم تقربيا ، لكن فترة العصر بجي ضوء اكتر بس بيكون ضوء بارد 😀.
كمان من ضمن الحاجات الحعملا كل فترة انو حنضف الأوراق بتاعت بقطعة قماش من الغبار او اي نوع عوالم، لانو دا بساعد النبته انو تمتص الضوء.
شاركوني تجاربكم مع الشجرات الصغيرة وكيف بتكبروها؟ او تجاربكم مع نبتت ال pelia.
زي ما ذكرت قبل كدا انو النباتات ممكن تظهر عليها بعد علامات الاسترس لمن نغيير ليها الاصيص ودا طبيعي ، بتاخد شويه وقت وبتتؤام مع الوضع الجديد.
������❤❤����☘������⚘��
ردحذف🙏🏿
حذف