ZZ plant 🪴 زيزي بلانت

 زاميا او زيزي  (ZZ)بلانت او Zamioculcas  , من أسهل النباتات الداخليه التي يمكن اغتناءها.  دا بيرجع لي انها ممكن تعيش في أجواء مختلفة و تستحمل مثلا الإضاءة المنخفة او العكس وكمان مابتحب المويه ودا بعني انو هي نبته مامكلفه لي مجهود يذكر برغم جمالها. انا كمان بعتبرها من النباتات الصنديدة(انا شخصيا زيزي حقتنا  استحملتني كتير).

المرة دي عايزا أشارك معاكم تجربتي في انعاش زيزي بلانت ، ومن خلال مشاركتم لتجربتي دي حستعرض بعض tips og triks  عن رعاية زيزي بلانت.

قبل ما ابدا عايزا اوضح انو فترة النمو للنباتات  هو دايما الربيع والصيف للناس العايشه في إمكان فيها الفصول الأربعة،  بالرغم من انو في بعض الحالات ونتيجه لبعض الظروف في نباتات بتستمر في النمو  في الخريف والشتاء.

وبما انو موسم النمو دا بدا ونحنا اخيرا دخلنا علي الربيع 💗🐣🌺 قررت انو انعش ال زيزي بلانت حقتنا،  بالرغم من انها كانت منتظرا للانعاش من بداية الشتاء ، بس انا قدرت تقديرا انو افضل تستحمل لحدي بدايه الربيع بدل مايبقي عليها تعب وانعاش في الوقت الغلط .

بعد الإنعاش

طيب انا انعشتها لي ؟ وانعشتها كيف؟ 

انعشتها لانو معظم النباتات الفي البيت اتعرضت ل ( trips) وهو نوع من انواع الآفات،  وهي تعبت مابسبب ال (trips)بس ، لكن كمان بسبب العلاج العملتوا للمشكلة دي ، ودا موضوع حتناولوا مرا تانيه. 

زيزي كانت كبيررررة وعندها غصون كتيرة لكن بعد الحصل ، وبسبب انو استاصلت كميه من الاغصان. لقيت زيزي انقسمت النص  زي مابيقولوا 😅. وهنا عايزا أشارك معاكم معلومة انو زيزي بلانت بتحب الاصيص يكون ضيق 🙂 فما تتسروعوا اصلا في تغيير الاصيص الا لمن تحسوا بيهو عايزا يطرشق او الجزور بقت طالعه من فتحات  التصريف بتاعت الاصيص. 

                            قبل الانعاش

 غيرتا الاصيص من اصيص كبير لي اصيص أصغر اتخيلوا 😂😂 كاول خطوة من خطوات الإنعاش يعني عكس البحصل كل مرا في موضوع تغيير الاصيص. كمان اخترت ليها اصيص فخاري ، وهنا برضو عايزا اقول معلومة انو زيزي بلانت بتحب الاصيص الفخاري لانو بمتص المويه ودا بساعد علي جفاف التربة سريع سريع بما انو زيزي بلانت ماااابتحب الموية الكتيرة وممكن جذورها تتعفن بسبب الموضوع دا.

الإنعاش كان كمان من خلال اني اتخلصت من كل التربة القديمة مع انو كانت تربه ظااابطه مع زيزي ، لكن انا عملت كدا شان كنت خايفه من احتمالية انو (trips) الأنا قضيت عليها والحمدلله تكون بيضت لي في التربة 🥺. 

فقلت الضمان امان ، وهنا ممكن تاني اقول معلومة عن التربة البتناسب زيزي بلانت وهي التربة البيكون فيها اقل شي ٦٠ % من الوسائط البتعمل علي تصريف الموية من التربة. تقريبا كدا زيزي بتحب نفس نوع التربه البناسب الصباريات. في حالتي انا استخدمت  ٤٠% تربه نباتات عااااادية وال ٦٠% الباقي كان رملة +برلايت+ لحاء اشجار و ليكا. ممكن عادي نستخدم نوع واحد بس من الوسائط البتعمل علي تصريف الموية. طبعا اي نوع من الأنواع المذكورة فوق دي بتصرف الموية بطريقتا 🤩. 

برلايت (perlite)+لحاء اشجار(ORkide jord)+رمله (såjord)

يلا ، غسلت الاصيص الفخاري نضييييييف ، وفي قاع الاصيص وضعت شوية ليكا لانو بحب الحركة شان بتدي ضمانات اكتر لتصريف الموية من خلال انو بتمتصاها.

  ليكا في قاع الاصيص(Lecakuler)

 وباقي الحاجات ديك عملت منها مكس وقمت بتغيير الاصيص باصيص وتربة جديدتان. طبعا اتأكد من اني اتخلصت من كل التربة القديمة  الكانت حول الجزور ، كمان اتخلصت من كل الأجزاء التعبانة في النبته من خلال استخدام مقص معقم.

طبعا لقيت زيزي عندها نمواءت جديدة🤩🤩🤩 وبكدا ضمنت انو ساعدتها في الوقت المناسب ، لانو النمواءات دي كانت احتمال كبير تموت وماتمش قدام في الظروف القديمه  للنبته.

بعد كدا جيت سقيتها موية ، هنا عايزا تاني اقول معلومة عن انو بنسقي كيف ، مع انو موضوع بنسقي كم مرة اكيد بتختلف حسب نحنا في ياتو ظروف مناخية،  كمان حجم النبته والاصيص برضو بلعب دور. لكن بنشقي كيف دي ممكن اعلق عليها . في كم طريقة نسقي بيها من ضمنها انو نسقي النبته بالموية المناسبه وننتظر شويا ونشوف لو الموية بدت تطلع من فتحات التصريف المن تحت معناتا نوقف ولو حصل العكس نواصل نسقي تاني لمن الموية تبدأ تطلع من تحت. لو النبته قاعدة في اصيص زينه لازم نتأكد انو ماف مويه مخزنه تحت. اخر شي في موضوع المويه هو انو زيزي بلانت مابتحب المويه الكتير  لانو بتحفظ مويه ف الجذور والأوراق  وانا بتعامل معاها نفس معاملتي للصبار وبخليها تجف تماما وممكن بعد تجف نصبر عليها تاني شوية حتن نسقيها. 

اخر حاجتين عملتها في موضوع الإنعاش انو غيرتا ليها المحل.تااااني معلومه ، تغيير المحل مهم للشجر بس ماطوووووالي. يعني مثلا في الربيع والصيف الفات زيزي بلانت كانت قاعده في المدخل وكانت مستمتعه لانو المكان كان فيهو ضوء كوووويس ، بس لمن جاء الشتاء دخلتها من المدخل للداخل شان البرد . هسي بما انو بدايه الربيع بس لسه المدخل بارد بالنسبه ليها فخليتها تقعد في المطبخ بما انو المطبخ بتدخلوا كمية ضوء كبيرة . 

الحاجة التانيه انو نضفت ليها الصفق (الاوراق) الفضل دا صفقة صفقة بقطع قماش مبللوة بشوووية موية ، الحركة مهمه شديد لانو تنظيف الغبار من سطح الصفق او الأوراق بساعد النبته انو تمتص الضوء كووويس. ودي اكتر حاجه مكلفه ممكن نعملا لزيزي بلانت من فترة لفترة.

بالمناسبة ماننسي ، انو لمن نغيير الاصيص لي اي نبته ، النبته حيكون في الغالب عندها ردة فعل وبتسترس بعض الشي تجاه الحاجه لحدي ماتقدر تواءم نفسها مع العزة الجديدة دي ، فما تتخلعوا لو شفتو بعض الصفق تغيير لونوا او الصفق الصغير بدا يقع 😉

انا المرا دي ركزت علي تجربتي لانعاش زيزي بلانت، المرا الجاي حتكلم بتفصيل اكتر عن كيفية رعايتها.

شاركوني تجاربكم  وصور لزيزي بلانت  بتاعتكم ،  او استفسار  لو وجد 🙃🙂🙏🏿🙏🏿🙏🏿🙏🏿  ولو حابين تشوفوا عمليه الإنعاش ممكن تشوفها في صفحتي علي الفيس: 

https://fb.watch/byex1Xkx3L/

كمان حتلقوني علي الانستغرام :

https://www.instagram.com/amna_plants_lover/

واليوتيوب:

https://youtube.com/channel/UCThYeMNWDtGvjc_MAowbBLA